Dr. ELNUR NƏSİROV.
RAŞİDİ XƏLİFƏLƏR DÖVRÜNDƏ AZƏRBAYCANIN FƏTHİ
Bu
kitab müəllifi tərəfindən 1977-ci ildə Türkiyə Respublikası Səlcuq
Unversiteti, İctimai Elmlər İnsitutunda Prof. Dr. Mikayıl Bayramın elmi
rəhbərliyi altında magistr işi olaraq yazılmış və müdafiə
edilmişdir.Prof. Dr. Əhməd Önkal və Prof. Dr.Zəkəriyyə Kitapçı bu əsərə
müsbət rəy vermişlərdir.
IV Xəlifə Əli ibn Əbu Talib Dövrü (656-661) Xilafət daxilində xəyanət və zorakılıqların başlanması
Xəlifə Osman ibn Əffanın hakimiyyətinin ikinci dövründə, yəni
650-656-cı illərdə xilafətdə hakimiyyət daxili ziddiyyətlər baş
vermişdi. Kufə, Bəsrə, Misir əhalisi tez-tez öz valilərindən xəlifəyə
şikayət edir, narazılıqlarını bildirirdilər. 656-cı ildə bir qrup
misirli Mədinəyə gələrək validən narazı olduqlarını və bunun günahının
da xəlifədə olduğunu bildirərək Osman ibn Əffandan xəlifəlik məqamından
əl çəkməsini tələb etmişdilər. Bu tələblər rədd ediləndən sonra onlar
xəyanət və zorakılığa əl ataraq xəlifənin evini mühasirəyə almışdılar.
Üsyançılar xəlifəyə ərzaq və su verilməsinin qarşısını almışdılar.
Nəhayət insanların əksəriyyətinin həcc ziyarəti üçün Məkkəyə getməsindən
istifadə edin üsyançılar xəlifənin evinə hücum etmişdilər. Əbu
Hureyrə, Həsən ibn Əli ibn Əbu Talib, Abdullah ibn Zubeyr ibn Əvvam və.s
şəxslər əldə qılınc xəlifəni müdafiə etmişdilər. Buna baxmayaraq
üsyançılar xəlifənin evinə soxularaq h.35-ci ilin zilhiccə ayında (may
656) 82 yaşında olan xəlifə Osman ibn Əffanı (r.a.) qətlə yetirmişdilər.
Onlar xəlifənin evini talan edərək xəzinəyə məxsus 3.500.000 dirhəm və
100.000 dinarı da aparmışdılar. Osman ibn Əffan şəhid edilərkən Quran-i
Kərim oxuyurdu. Başından aldığı qılınc yarasından axan qanın bir neçə
damcısı Quran-i Kərimin «Onlara qarşı Allah sənə yetəcəkdir. O, səmidir
(eşidən) və alimdir (bilən)» (əl-Bəqərə surəsi-137) ayəsinin üzərinə
düşmüşdü(İbn Kəsir, əl-Bidayə, c. VII, s. 278.). Həmin o Quran bu gün də
mövcuddur. Daxildəki qarışıqlıqların fütuhata təsiri
Osman ibn Əffanın şəhid edilməsindən sonra Rəsulullahın (s.a.v.)
əshabının yekdil qərar və xalqın əksəriyyətinin beyəti ilə Əli ibn Əbu
Talib (r.a.) xəlifə seçildi. Qəhrəman, zəkalı, uzaqgörən, hikmət sahibi
bir şəxs olan Əli ibn Əbu Talib Rəsulullahın (s.a.v.) evində böyümüş,
ondan tərbiyə almışdı. O, Quran-i Kərimi ən yaxşı bilən səhabələrdən
biri idi. Əli ibn Əbu Talib özü bu haqda belə demişdir: «Vallahi,
Allahın Kitabında elə bir ayə yoxdur ki, mən onun gecəmi, gündüzmü,
düzənlikdəmi, dağdamı endirilmiş olduğunu bilməyim»(Həsən İbrahim, həmin
əsər, c. I, s. 349.). O, öz vəzifəsinin icrasına Ömər ibn Xəttabın
üsuli idarəsinin tətbiqi ilə başlamışdı. Əli ibn Əbu Talib də Ömər ibn
Xəttab kimi zahidanə həyat tərzi yaşayırdı. O, bəzi valiləri
vəzifələrindən azad etdi. Maaş və ətiyyələrin miqdarını Ömər ibn
Xəttabın dövründə olduğu kimi müəyyənləşdirdi. Bu isə bəzi dövlət
məmurlarının, xüsusən də Bəni Uməyyə ailəsindən olanların ciddi
narazılığına səbəb olmuşdu(Əbu Hənifət Əhməd ibn Davud əd-Dinəvəri,
Kitab-ul-Əxbar-ut-Tival, Bağdad (tarixsiz), s. 140; Həsən İbrahim, həmin
əsər, c. I, s. 343; Kazıcı, həmin əsər, s. 37.). Bu hadisələr
mənfi cəhətdən inkişaf edərək, belə demək mümkündürsə, vətəndaş
müharibəsinə səbəb olmuşdu. Cəməl (cəmadiyəl-əvvəl h.36/oktyabr 656) və
Sıffeyn (səfər h.37/iyul 657) döyüşlərində iştirak edən əsgərlərin
sayını nəzər alsaq, Bizans və Xəzər cəbhələrindəki vəziyyəti təsəvvür
etmək çətin olmaz. Bundan başqa, ordu arasında xəvaric təmayüllü
insanların çoxalması da əsgərlərin döyüş qabiliyyətinə mənfi təsir
göstərirdi. Xəvaric məşru (qanuni) hakimiyyəti silah gücü ilə
dəyişdirməyə tərəfdar idi. Onlar bəzi məsələlərdə xəlifəyə qarşı çıxaraq
üsyan etmişdilər və vəziyyətdən yeganə çıxış yolunu Əli ibn Əbu Talibi
hakimiyyətdən uzaqlaşdırmaqda görürdülər. Fəqət Əli ibn Əbu Talib onlar
hücum etmədikcə onlara qarşı güc tətbiq etməmiş və onları yola gətirməyə
çalışmışdı. Bu məqsədlə əvvəl Qeys ibn Sədi, sonra Əbu Əyyub
əl-Ənsarini, sonra da Abdullah ibn Abbası onlarla danışığa göndərmişdi.
Abdullah ibn Abbasın xəvariclə apardığı danışığı mənbələr nəql edirlər.
Abdullah ibn Abbas özü bu hadisəni belə təsvir etmişdi: «Mən onların
yanına günorta vaxtı getmişdim. Əynimdə yəmən parçasından tikilmiş gözəl
bir paltar vardı. Onlar günortanın istisində istirahət edirdilər. Çox
ibadət edir, namaz qılırdılar. Üzlərində yuxusuzluq əlaməti görünürdü.
Əlləri ibadət etməkdən dəvənin dizi kimi qabar atmışdı. Məni görən kimi
onlardan biri: «Bu əynindəki paltar nədir belə?» dedi. Mən ona: «Yoxsa
bununla mənə irad tutursunuz? Mən Allah Rəsulunun (s.a.v) əynində bundan
daha gözəlini görmüşəm və bu ayə nazil olmuşdu: «Allahın öz qulları
üçün yaratdığı zinət və təmiz ruziləri haram qılan kimdir?» (Əraf
surəsi, 32). Sonra isə onların arasında aşağıdakı mükalimə olmuşdur. - Xəvaric: Buraya niyə gəlmisən?
- İbn Abbas: Buraya sizə Allah Rəsulunun (s.a.v) əshabı haqqında
danışmağa gəlmişəm. O insanlar haqqında ki, vəhy nazil olarkən onların
üzərinə nazil olurdu. Halbuki mən onlardan heç birini sizin aranızda
görmürəm. Mənə deyin görüm, Allah Rəsulunun (s.a.v) əmisi oğlu və
kürəkəni olan, ona ilk iman edənlərdən biri olan və səhabənin tərəfini
tutduğu adama siz nə vermisiz ala bilmirsiz? - Xəvaric: Biz ona üç məsələdə müxalifik. - İbn Abbas: Nə məsələdir onlar?
- Xəvaric: Əvvəla, Allahın dinində insanları hakim qıldı. Halbuki Allah
buyurur: «Hökm ancaq Allahındır» (Yusif surəsi, 40). Allahın bu
kəlamından sonra insanların hökmdə nə işi ola bilər? - İbn Abbas: Sonra?
- Xəvaric: Əli insanlarla vuruşdu. Amma nə əsir aldı, nə də qənimət.
Əgər vuruşduqları kafir idilərsə, malları Əli üçün halal olmalıydı. Yox
əgər mömin idilərsə, möminin qanını tökmək haramdır. - İbn Abbas: Sonra? - Xəvaric: Əmirəlmöminin titulundan əl çəkdi. Əgər möminlərin əmiri deyilsə, deməli kafirlərin əmiridir. - İbn Abbas: Ona başqa bir mövzuda etirazınız var? - Xəvaric: Bunlar bizim üçün kifayət edir. - İbn Abbas: Əgər sizə Allahın kitabından və Rəsulunun sünnəsindən dəlillər gətirsəm, bu tutduğunuz yoldan əl çəkərsiz? - Xəvaric: Bəli.
- İbn Abbas: Allahın dinində insanların hökm verə bilib-bilməməsinə
gəldikdə, Quranın «Ey insanlar ehramlı ikən ov öldürməyin» deyə başlayıb
«aranızdan ədalətli olan iki nəfər hökm versin» deyə bitən ayəsini
(Maidə, 95) və «Əgər ər ilə arvadın arasının dəyməsindən ehtiyat
edirsəniz kişinin ailəsindən bir, qadının ailəsindən də bir hakim
göndərin» (Nisa, 35) ayələrini oxuyun. İndi mən sizdən, Allaha and
verərək, soruşuram deyin, insanların bir-birinin qanını
tökməsinin(Sıffeyn müharibəsində Əli ibn Əbu Talib və Muaviyənin
əsgərləri vuruşarkən, döyüşü dayandırıb hər iki tərəfdən tam
səlahiyyətli iki hakim (vəkil) göndərilməsi təklif olunmuşdu. Bu
hakimlərin qərarı ilə də problem həll olunacaq və hamı bu qərarla
razılaşacaqdı.) qabağını almaq daha əfzəldir, yoxsa qiyməti dirhəmin
dörddə biri qədər olan dovşanı öldürməyin və hansısa qadının
boşanmasının qarşısını almaqmı daha xeyirlidir? Üstəlik Allah istəsəydi
özü hökm verərdi bu haqda, insanların öhdəsinə qoymazdı. - Xəvaric: Vallahi qan tökülməsinin qarşısını almaq daha fəzilətlidir.
- İbn Abbas: Sonra, deyirsiniz ki, Əli vuruşdu, amma nə qənimət aldı,
nə də əsir götürdü(Cəməl döyüşündə Əli ibn Əbu Talibin əsgərləri ilə
vuruşan orduda Aişə (r.a.) də var idi.). Deyin, siz də möminlərin anası
Aişəyə söyürsünüz? Ya da başqa qadınlarda halal bildiyinizi onda da
halal bilirsiniz? Əgər belə fikirləşirsinizsə, deməli kafir olmusunuz.
Yox əgər onun möminlərin anası olmadığını iddia edirsinizsə, yenə kafir
olmusunuz demək. Çünki Allah buyurur: «Peyğəmbər möminlərə öz
nəfslərindən daha əvladır, zövcələri də onların analarıdır» (Əhzab, 6).
Görürsünüzmü, siz iki zəlalət arasında çaşıb qalmısınız. İndi hansını
seçirsiniz seçin. Artıq bu fikrinizdən də əl çəkdiniz deyilmi? - Xəvaric: Vallahi bəli.
- İbn Abbas: Üçüncü məsələyə gəldikdə, Hudeybiyyə gününü xatırlayın.
Suheyl ibn Əmr və Əbu Sufyan Rəsulullahla (s.a.v) müqavilə bağlamağa
gəlmişdilər. Müqavilənin mətnini Əli yazırdı. Onlar müqavilədə
Peyğəmbərin öz adını «Allah Rəsulu Muhəmməd» olaraq yazılmasına etiraz
etdilər və dedilər ki, əgər biz sənin Allahın Rəsulu olduğuna inansaydıq
səninlə vuruşmazdıq, indi də müqavilə bağlamağa ehtiyac qalmazdı.
Bundan sonra Peyğəmbər dedi ki, vallahi siz inansanız da inanmasanız da
həqiqət budur ki, mən doğrudan da Allahın Rəsuluyam. Sonra da Əliyə əmr
etdi ki, müqavilədə öz adını Muhəmməd ibn Abdullah kimi qeyd etsin.
Peyğəmbərin müşriklərin bu tələbi ilə razılaşması onu Allahın Rəsulu
olmaqdan çıxarmadı. Bu fikrinizdən də əl çəkdinizmi? - Xəvaric: Vallahi bəli.
Bu danışıqlardan sonra xəvaricdən 2000 min nəfər qayıdıb İslam ordusuna
qoşuldu. 4000 nəfər isə zəlalət yolunda qaldılar və xəlifə ilə vuruşmaq
qərarına gəldilər. Bu mükalimə xəvariclərin əslində nə qədər cahil
olduqlarını və məsələlərə nə qədər səthi yanaşdıqlarını göstərir.
Nəhrivan müharibəsində bu 4000 nəfər demək olar ki, tamamən İslam ordusu
tərəfindən məhv edildi. Bu döyüşdə xəlifənin ordusundan cəmi 8 nəfər
şəhid olmuşdu(Əbdulqadir əl-Mühacir, İbn Abbasın Xəvariclə Münaqişəsi,
s. 2-3. (Bu əsər www. islah. de, web ünvanında nəşr olunur)).
Bizans cəbhəsində döyüşlər tamamən dayandırılmışdı. Xəlifə Əliyə qarşı
üsyan qaldırmış Suriya valisi Muaviyə ibn Əbu Sufyan iki cəbhədə
döyüşməmək və qüvvələrini cəmləşdirə bilmək üçün bizanslılarla sülh
müqaviləsi bağlamışdı(Uçar, həmin əsər, s. 76.). İslam ordularının əzici
zərbələrindən müvəqqəti də olsa, xilas olan Bizans şərqə yönəlmiş və
köhnə müttəfiqləri olan Qafqaz xristianları və xəzərilərlə əlaqələrini
canlandırmağa başlamışdı. Qafqazın xristian xalqları xəzərilərin talançı
hücumlarından qorunmaq üçün Bizansa yaxınlıq göstərməyə məcbur
olmuşdular. Bizans imperatoru ərəblər tərəfindən Ərməniyyə, Albaniya,
Sisyan və Qafqaz dağlarından Dərbəndə qədər olan ərazilərin məliki təyin
olunan erməni Teodor Rştunini qovub, onun yerinə bu vəzifəyə Alban
knyazı Cavanşiri təyin etmişdi(Moisey, həmin əsər, s. 128.). Bizans imperatoru II Konstansın Qafqaza yürüşü
II Konstansın hakimiyyətə gəlməsi ilə Bizans paytaxtında taxt-tac
uğrunda mübarizəyə son qoyulmuş və ölkə siyasi istiqrara qovuşmuşdu. Bu
siyasi sabitlik nəticəsində Bizansın xarici siyasətində canlanma
müşahidə edilmişdi. Bu canlanma Zaqafqaziyada da özünü bariz şəkildə
göstərirdi. Bizans imperatoru köhnə müttəfiqi Xəzər xaqanı ilə əlaqələri
yenidən qurmuş və gücləndirmişdi. İmperator iri xristian feodallar
arasındakı siyasi çəkişmələrdən və kilsələr arasındakı məzhəb-etiqad
ixtilaflarından məharətlə istifadə edərək qısa müddətdə Zaqafqaziyada
siyasi təşəbbüsü ələ ala bilmişdi. II Konstansın fəallaşması, ərəblərdən
ard-arda aldığı ağır zərbərdən hələ də özünə gələ bilməyən, Xəzər
xaqanı üçün ələ düşməyən fürsətə çevrilmişdi. Bizansın təşviq və təhriki
ilə Ukrayna və Cənubi Rusiya düzənliklərində yaşayan türk qəbilələri
ilə hərbi ittifaq quran xaqan bunun sayəsində ordusunun sayını xeyli
artırmışdı. İbn-ul-Əsəm, hər nə qədər ifrata varsa da, bu müttəfiq türk
ordusunun sayının 300 mini keçdiyini qeyd edir(İbn-ul-Əsəm,
Kitab-ul-Fütuh, s. 10.). Müsəlmanların Albaniyanı fəthi ilə
sabitliyə və rifaha qovuşaraq, xəzərilərin dağıdıcı hücumlarından qısa
müddət üçün də olsa, qurtulmuş olan xalq ərəblərin Araz çayının cənubuna
çəkilməsindən narahatlıq duyurdular. İri feodalların hakimiyyət uğrunda
mübarizəyə girişməsinin qarşısını almağa və ölkəsini parçalanmaqdan
xilas etməyə çalışan Alban knyazı Cavanşir Bizans imperatoruna öz
sədaqətini və bağlılığını bildirən bir məktub göndərmişdi. II Konstans
onun bu itaətkar məktubunu məmnuniyyətlə qarşılamış, ona cavab məktubu
və hədiyyələr göndərmişdi(Moisey, həmin əsər, s. 226.). Bir müddət
sonra II Konstansın özü də Zaqafqaziyaya gəlmişdi. 660-cı(Bu səfərin
tarixi haqqında müxtəlif fikirlər mövcuddur. Prof. Şahin Uçar əsərinin
72-ci səhifəsində bu səfərin 652-ci ildə edildiyini yazır. VII əsr alban
salnaməçisi Moisey Kalankaytuklu isə öz salnaməsində (s. 128) II
Konstansın (641-668) hakimiyyətinin 19-cu ilində Qafqaza yürüş etdiyini
qeyd edir.) ildə Ərməniyyəyə gələn imperator həmin ilin qışını Dəbil
şəhərində keçirmişdi(Uçar, həmin əsər, s. 72.). Alban knyazı Cavanşir
Mehranini yanına dəvət edən imperator onunla bir neçə dəfə görüşəndən
sonra müqavilə imzalamışdı. Bu müqaviləyə görə knyaz Cavanşir (637-681)
imperator tərəfindən İberiya (Gürcüstan) sərhədlərindən Dərbəndə və Araz
çayına qədər olan torpaqların hökmdarı kimi tanınırdı(Moisey, həmin
əsər, s. 128.). Buna baxmayaraq, Bizans Zaqafqaziyada öz mövqeyini
möhkəmlədə bilməmişdi. II Konstans Konstantinapola qayıdan kimi erməni
məliki Teodor Rştuni ərəbləri öz ölkəsinə çağıraraq Ərməniyyəni onlara
təslim etmişdi. Ərəblərin köməyi ilə imperatorun əsgərlərini öz
ölkəsindən qovan Teodor Əməvi hökmdarı Muaviyə ibn Əbu Sufyan tərəfindən
Gürcüstan, Ərməniyyə və Albaniyanın məliki təyin olunmuşdu(Uçar, həmin
əsər, s. 73.). Öz hakimiyyətini möhkəmlədəndən sonra Muaviyə ibn Əbu
Sufyan Alban knyazı Cavanşirlə bir neçə diplomatik görüş keçirərək onu
öz tərəfinə çəkə bilmişdi(Moisey, həmin əsər, s. 135.). Bizansın
Zaqafqaziyada siyasi mövqeyini möhkəmlədə bilməməsi, hegemoniyasının
müvəqqəti və bəsit səbəblərə əsaslanmasına görə idi. Uzun illər boyu
davam edən müharibələr vaxtı Zaqafqaziya millətləri həm Bizans, həm də
Sasanilər tərəfindən tətbiq edilən siyasi təzyiqlərin ağır nəticələrinə
məruz qalmışdılar. Zaqafqaziya millətlərinin xristian olmaları İran
şahlarının onlara etibar etməməsi üçün mühüm səbəb idi. Buna görə də
onlar məcusi din adamlarının və Sasani məmurlarının təzyiqlərinə məruz
qalırdılar. Bizansın Qafqaz siyasəti də bundan fərqli deyildi. Məzhəb və
etiqad ixtilafı Bizans paytaxtı ilə əyalətlər arasında kin və nifrətin
artmasına səbəb olmuşdu(Uçar, həmin əsər, s. 56.). Arran knyazı Cavanşir Mehraninin (637-680) siyasi fəaliyyətləri
643-cü ildə Albaniya (Arran) torpaqlarına girən müsəlmanlar Şirvan
məmləkətini fəth etmişdilər. Cavanşirin atası yaşlı Varaz Qriqor ərəb
komandirlərlə bir neçə dəfə görüşərək onlarla əhd bağlamışdı(Moisey,
həmin əsər, s. 122.). Atasından fərqli olaraq Cavanşir Bizansla ittifaqa
tərəfdar idi. Erməni çarını da bu ittifaqın səmərəliliyinə inandıran
Cavanşir Konstantinopola elçi heyəti göndərmişdi. O, Bizans imperatoruna
yazdığı məktubda belə deyirdi: «Bizanslıların müzəffər, əzəmətli və
mərhəmətli imperatoru, dənizlərin və quruların Tanrı tərəfindən təyin
olunmuş hökmdarı Konstans Avqust, sənə Albaniyanın knyazı Cavanşir
səndən asılı olan öz şərq ölkəsi ilə birlikdə mütilik salamlarını
göndərir. Səndən uzaq olan bu xalqı öz himayənə almaq təklifimiz qoy
sənin kimi İsa sevimlisi hökmdar üçün xoş olsun ki, sənin əzəmətli
şöhrətindən və bizim itaətkarlığımıza görə sənin ilahi iltifatından bizə
də pay düşsün». II Konstans bu təklifə müsbət yanaşmış, ona cavab
məktubu ilə birlikdə gümüş taxt, qızıl işləməli paltar və qını mirvari
ilə bəzədilmiş öz qılınclarından birini hədiyyə göndərimişdi(Eyni əsər,
s. 126.). İmperator 660-cı ildə Zaqafqaziyaya yürüş etdiyi vaxt
Cavanşirlə iki dəfə, Ərməniyyənin Kinkivar və Vaqarşapat şəhərlərində
görüşmüş, onu Gürcüstandan Dərbəndə və Araz çayına qədər olan
torpaqların böyük knyazı təyin etmişdi(Eyni əsər, s. 127-128.).
Bizans imperatorundan sonra Xəzər xaqanı da Cavanşirə bir elçi heyəti
göndərmişdi və seçmə atlar, kölələr və bir çox qiymətli hədiyyələr
göndərmişdi. 662-ci ildə arvadının ölümündən sonra, Cavanşir Xəzər
xaqanının qızı ilə evlənmişdi. Bu onun üçüncü evliliyi idi(Eyni əsər, s.
132.). Siyasi hadisələrin bu məcrada inkişafı nəticəsində Albaniya və
Zaqafqaziya, qısa bir müddət üçün də olsa, İslam dövlətinin nəzarətindən
çıxmışdı. Bizans və xəzərilər xilafət daxilindəki iğtişaşlardan geniş
surətdə öz mənfəətləri istiqamətində faydalanmışdılar. Bundan ən çox
faydalanan isə heç şübhəsiz knyaz Cavanşir olmuşdur. Xəzər xaqanının
kürəkəni olduğu üçün, o, regiondakı siyasi müvazinətin mühüm amilinə
çevrilmişdi. Bu qohumluq sayəsində o, ölkəsini xəzərilərin talançı
hücumlarından qorumuş oldu. Bizans imperatoru ona müttəfiq nəzəri ilə
baxırdı. Bunun sayəsində də Cavanşir hakimiyyət uğrunda mübarizə aparan
iri feodalların özbaşınalığına son qoymuş və öz hakimiyyətini zəmanət
altına almışdı. Mövqeyinin bu dərəcədə möhkəmlənməsi Cavanşiri ərəblərin
nəzdində də mühüm siyasi fiqura çevirmişdi. Hicri 40-cı ilin
ramazan ayında (yanvar 661) Allah Rəsulunun (s.a.v) IV xəlifəsi Əbi ibn
Əbu Talib (r.a.) xəvaric (xaricilər) tərəfindən təşkil olunmuş sui-qəsd
nəticəsində şəhid olmuşdu. Onun vəfatından sonra hakimiyyəti ələ alan
Muaviyə ibn Əbu Sufyan xilafət daxilində qismən sabitlik yaratmağa nail
olmuşdu. Bizanslıların Şərqi Anadolu və Zaqafqaziyadakı xilafət
torpaqlarını zəbt etməsi Muaviyənin həftəsinə 1000 dinar ödəyərək satın
aldığı sülh müqaviləsinin hökmünü hüquqi olaraq qüvvədən salmışdı.
Muaviyənin öz qüvvələrini bir cəbhədə cəmləşdirməsi ilə Bizans-Ərəb
müharibələri yenidən başlamışdı. Bizanslıların cəbhədə arxa-arxaya
məğlub olması ilə Konstantinopolda çaxnaşma baş vermişdi. Kilsənin işə
qarışması ilə II Konstans tamamən etibarını itirmiş və paytaxtı tərk
edərək ölkənin qərbinə qaçmağa məcbur olmuşdu(Uçar, həmin əsər, s. 77.).
Hadisələrin bu məcrada inkişafı knyaz Cavanşiri narahat edirdi.
Muaviyə ona görüşmək üçün Dəməşqə dəvət edən məktubu ilə birlikdə bir
çox qiymətli hədiyyələrlə elçi heyəti göndərmişdi. Bununla Cavanşir öz
ölkəsini ərəblərin ehtimal olunan hücumundan qorumaq üçün yaxşı fürsət
əldə etmişdi. Knyaz Cavanşir 667-ci ildə Dəməşqə getdiyi vaxt Muaviyə
onu mərasimlə qarşılamışdı. O, Dəməşqdə ikən Bizans səfiri də Muaviyə
ibn Əbu Sufyanla görüşmək üçün gəlmişdi. Bu diplomatik görüşmələrdə
vasitəçi kimi iştirak edən Cavanşir Muaviyənin təqdirini qazanmışdı.
Qiymətli mükafatlarla təltif edilən knyaz Cavanşir Mehrani Əməvi
hökmdarı ilə müqavilə bağlayaraq öz ölkəsinə qayıtmışdı. Ömrünün sonuna
qədər bu müqaviləyə sadiq qalan Cavanşir, 680-ci ildə 64 yaşında ikən
Bizansla ittifaqa tərəfdar olan feodalların hazırladıqları sui-qəsd
nəticəsində öldürülmüşdü(Moisey, həmin əsər, s. 145-146; Bünyadov, həmin
əsər, s. 77-78.). 705-ci ildə Albaniya qəti olaraq İslam dövlətinin
idarəsinə keçmiş və Mehrani sülaləsinin hakimiyyəti sona çatmışdı.
Fayl olaraq yüklə: 7.reshidiXelifeler_azerb.fethi.doc
7.reshidiXelifeler_azerb.fethi.pdf Mobil telefon üçün yüklə: 7.reshidiXelefeler_azerbaycaninFethi.jad
7.reshidiXelefeler_azerbaycaninFethi.jar
Ardı: 8-ci Hissə
|